مهندس الواقع مهندس الواقع
recent

آخر الأخبار

recent
جاري التحميل ...

ازاي تتفق مع المقاول و الصنايعي

  




ازاي تتفق مع مع مقاول أو صنايعي ؟وتحصل على اعلى مواصفات واقل سعر
 

ماذا تشترط في العقد بينك و بين الصنايعي أو المقاول
اهم النقاط قبل توقيع العقد مع مقاول
ما هي الشروط التي أضعها في عقد المقاول ؟
إزاي تحاسب الصنايعي
أزاي تحاسب المقاول


الموضووع ده مهم جدا  لان لما تنزل سوق العمل وتكون مهندس استشاري في شركة  والمقاولين اللي انت بتشتغل معاهم يقولك السعر ده ما يسمحش بالاستلامات دي او مستوى الاستلامات دي . 



الصنايعي الممتاز للأسف دايما معاه شغل..فهتتفق معاه يجيلك يرفع المقاسات ويتفق وتجهزله الخامات وتصبر عليه لما يخلص الشغله اللي معاه... لو لاقيته قدامه كتير...مش اشكال لأن هو دكتور في تخصصه .. ومش هتندم بعد ما يشتغل.. متجيبش صنايعي مجربتوش او شفت شغله...مفيش مانع تروح المكان اللي بيشتغل فيه تشوف شغله.

خد فكره عن الحاجه اللي هتعملها..اذا كان محاره مثلا تكون فاهم يعني ايه محاره وضهاره ومصيص وسوك وشغل عالإيده او الدراع او البؤج والاوتار او التربيع والتربيات ويعني ايه سقف ساقط وكرانيش وجيبسوم بورد .. وده من خلال النت او المنتدى هنا.
خليك ناشف مع الصنايعي..هو بيجس نبضك ويشوف انت زبون ولا هتطلع عينه...

إقرأ أيضاً كتاب تشطيبات يتكون من ثمان فصول في التشطيبات المختلفة


اتفق علي تفاصيل التفاصيل...يعني لو محاره مثلا تتفق ان السوك تسمنت مش جبس...هيتشقلب ويقولك مينفعش وياباشمهندس مش هنخللص وبتاع..قوله هات دراعات المونيوم واشتغل..ولا انت مش معلم فشغلك ولا ايه؟




صمم علي طلباتك متمشيش ورا دماغه هيعمل الأسهل...
اتفق علي الحساب بالتفصيل...هيقولك مش هنختلف قوله لا هنختلف...فهمني هنتحاسب ازاي...واكتب فورقه وعيد الكلام عليه وخلي الورقه معاك..مترميهاش..يعني مثلا هتعمل ارضيات وهتعمل سيراميك وبورسلين وارضيات وحوائط وسقف الحمام...كله بالمتر المربع بنفس السعر...وقت الحساب هيغالط ويقولك الحوائط غير الارضيات والبورسلين غير السيراميك والوزر بالمتر الطولي يا باشمهندس دي حاجه معروفه....تطلع الورقه وتبرومها وتحطها ف....عينه......!

إقرأ أيضاً نصائح للدخول في عالم المقاولات

بعد ما تتفق تفهمه انك متفق مع مهندس مدني زميلك بييجي يستلم من الصنايعي اللي بيشتغل ولو في فالشغل غلط هتكسر او هتعيد وتكلف مون علي حسابك.ومفيش مانع تعمل مكالمه حتي ولو لواحد صاحبك قدامه كأنك بتبلغه بالاتفاق وتعيد تفاصيل الورقه قدامه..


تأكد علي الصنايعي...مين اللي هيشتغل؟
هو اللي هيشتغل ولا هيجيب ناس تبعه؟
ناس تبعه قوله شكرا...هو بس معاه اخوه ولا ابن عمه ولا واحد شغال معاه..تقوله شغال وانت موجود وبيساعدك ماشي..هتعمل معلم ومقاول وبتشغل صبيان انا عايز صنايعي مش مقاول..
الأكل والشرب والمواعيد...
تتفق معاه من الأول...هتشتغل من امتي وتخلص امتي..؟
وزود علي اللي هيقوله اسبوع...
يعني هيقولك اسبوعين قوله لأ تلاته..من يوم كذا لكذا بس اليوم بعد كده عليك ب ٥٠ جنيه...وهنعمل عقد اتفاق وهتمضي عليه..
هتقوله انا هجيبلك سخان او كاتل وشاي وسكر وكوبايات لكن لا عندي حد يقف معاك ولا يعمللك شاي..انت عيش مع نفسك...هيفهم ان مفيش غدا ولا بلطجه..الا لو حبيت..


إقرأ أيضاً كتاب تصدع المنشآت الخرسانية وطرق علاجها


خللي بالك ده مش ضيف...ده مكلف بشغل يقوم بيه فبيتك..الا لو انت شركتك بتغديك كل يوم وتعملك شاي..ابقي اعمل زيهم.
متسيبش اي عده تخصك للصنايعي ..مفك..بنسه..شاكوش..لو مضربش عليها هيبوظهالك .كان عندي سباك بيوفر عدته ويستخدم العده بتاعتي علما باني كنت قافل عليها في شيكاره في اخر الشقه..
ولو شقتك ساكنه ..جمع كل اللي تخاف عليه في دولابك واقفل عليه بالمفتاح او غرفه واقفلها بالمفتاح او القفل..وعدتك في شنطه او صندوق بقفل...كان عندنا نقاش فالبيت لاقيناه ماشي مره فالشارع ببلوفر اختفي من دولاب الهدوم بتاعنا.



اتعامل مع الصنايعيه انهم مهملين ومخربين وخربق الذمم الا من رحم ربي وحرص ولا تخونش.
بلاش تتكلم مع الصنايعي وهو شغال..هاتله راديو او هو هيحط السماعات في ودنه...عشان لما بيفتحوا في الرغي وتضييع الوقت انت اللي هتندم...كبيرك توجهه او تقوله الله ينور..


إقرأ أيضاً الإشراف على عمل جسات التربة

ولما بيكون عندك بند وبينفذهولك الصنايعي فا انت حرصا منك بتحاول تدور على اي مصدر للمعلومات عشان تفهم في الموضوع ده والصنايعي ما يضحكشي عليك ف هتلاقي الصنايعي بيقوك مستوى الشغل اللي أنت عاوزه ده ما ينفعش أو انه مش هيقدر يطلع شغل بالجودة دي اللي انت عاوزها .


 

حل المشكلة دي كده  .هقلك الحل للتعامل بسهوله مع الصنايعي أو المقاو ل لو أنت المالك .

في البداية عندنا حاجة اسمها العقد  شريعة المتعاقدين عندك في العقد أي حاجة بتتفق عليها في البداية بكل عيوبها ومميزاتها بتريحك بعدين دي حاجة. تاني حاجة  يقولك العشم مات والمعاملة خد وهات أنا لازم اوضح كل حاجة من البداية وأساليب التحكيم كمان لو حصل خلاف بعد كده ازاي هحكم . بمعنى اصح انا كمهندس او مقاول او كمالك هعمل ليا مقايسة خاصة يعني ايه مقايسة خاصة هنقول في المنشأة  الانشاءية في مقايسة بتربط العلاقة بين الشركة والمالك والمقاول انا هعمل حاجة شبه كده على صغير مع أصح هطبع مخي مع مخ الراجل اللي شغال معايا طب أنا هطبعها ازاي الموضوع بسيط أنت كمهندس او لحاجة هتعملها لازم تعمل بند كده بينك وبين المقاول بص يا غالي قبل ما نشتغل مع بعض أنا هقعد معاك هفهمك مخي وافهم مخك ونطبع على بعض عشان ما نتعبش بعض , هتقوله اول حاجة كيفية تنفيذ البند عشان انت ممكن تقوله انت هتستلم كذا ويكون كلامهأنت عاوز تستلم مني  هسلمك بس ملكش دعوة انفذه ازاي .


وده في شغلنا كمهندسين مينفعش ف أنت هتتفق معاه كيفية تنفيذ البند وازاي اسلوب الاستلام ,وطرق التحكيم لو حصل خلاف بينك وبينه الكلام ده لازم يكون قبل ما تتفق معاه على السعر عشان يكون فاهم الشغل ده ,هل هو أصلا مؤهل انه يشيل الشغل ده ولا لأ ,ازاي تفهمه مراحل النفيذ للشغل ده .

وممكن لو أنا صاحب شركة أو مالك اربطه بموعد زمني بمراحل تنفيذية ,يعني قبل ما أجيب الصنايعي يشتغل أسمع البند ده بيتنفذ ازاي أساسا .عشان وانا بتفق معاه اكون فاهم انا بتكلم عن ايه .

بعد كده أجيب ورقة واكتب فيها الكلام ده كله مينفعش أاحتفظ بالكلام ده في عقلي بس ,واكتب تعاقد ودي نصيحة سواء أن كمهندس أ كمالك وعندكصنايعي في البيت , وعشان يطلع الشغل محترم اكتب التعاقد اللي بينك وبينه وكل كلمة تتقال في التعاقد ده واكتب بيانات طلباتك في الشغل ,وطرق التسليم ولازم تحضر نسبة من المبلغ مع كل جزئية من جزئية الشغل  تم تنفيذ البند البند هياخد نسبة كذا , تم التسليم طبقا للشروط  هياخد نسبة كذا ,كل مشكلة هيتم خصم نسبة كذا الحاجات دي كلها لازم تعمل عقد كامل و ولازم يكون فيه شهود للطرفين عشان تضمن حقك وتضمن حقه .





عن الكاتب

علاء الدين محمود

التعليقات


اتصل بنا

إذا أعجبك محتوى مدونتنا نتمنى البقاء على تواصل دائم ، فقط قم بإدخال بريدك الإلكتروني للإشتراك في بريد المدونة السريع ليصلك جديد المدونة أولاً بأول ، كما يمكنك إرسال رساله بالضغط على الزر المجاور ...

جميع الحقوق محفوظة

مهندس الواقع