|| ازاي تجيب تقدير في 3 خطوات ||

معضلة التقدير في الكلية وخصوصا سنة اولي، ديما بنلاقي طلبة كتير بتجتهد جدا في الكلية، لكن تقديرها بيكون متوسط وهم غير راضين عنه، وطلبة تانيين مبيذاكروش وبينجحوا وممكن يوصلوا لنفس تقدير المجتهدين. 

هنعرف في المقال دا ببساطة كل نوع من الطلبة عشان تحدد نفسك انت انهي نوع و الطريقة الصحيحة، عشان تحصل علي تقدير في الكلية. 

الطلبة ٣ انواع

1-الصايع

2-المجتهد 

3-الذكي

الصايع

ودا شخص بيكون عايش حياته طول السنه، مبيحضرش لا محاضرات ولا سكاشن ولا بيذاكر غير قبل الامتحان. 

منهجية الطالب دا انه بيدور علي انه ازاي ينجح بأقل مجهود. 

خطته كالاتي___

بيدرس دماغ الدكتور. 
يجمع الامتحانات القديمة. 
يركز علي الدرجات الأعلى. 
يحفظها. 

وفعلا بتلاقيه ناجح اخر السنة، ممكن يوصل لتقدير جيد أو جيد مرتفع كمان. 

المجتهد

ودا شخص صارم مع نفسه في الكلية، مبيغبش ابدا وبيحضر كل المحاضرات والسكاشن، ممكن يحضر محاضرات اكتر من مرة عشان يوصل لتقدير عالي، وبيحرم نفسه من حاجات كتير زي الخروجات، اللعب، الفسح عكس الاول تماما. 

منهجية الطالب دا هو ازاي اجيب امتياز، بس في الغالب مبيوصلوش. 

خطته كالاتي__

التزام بالحضور. 
مذاكرة باقي اليوم. 
غالبا بيحرم نفسه من الراحة. 
مقتنع ان مجهود اكتر = تقدير اعلي. 

ودا اخر السنة بتلاقيه طبعا ناجح، تقديره في الغالب جيد جدا او جيد ومبيكنش راضي عنه ابدااا. 

الذكي

دا غالبا شخصية اوائل الدفعة، ميزة الشخصية دي انها مرنة (عكس المجتهد) وعايز يفهم (عكس الحفيظ)، ودول نقاط قوة كبيرة ليه، بسبب ان بيجمع ما بين الاجتهاد و الروقان، عنده اتزان في حياته، بمعني يحضر المحاضرات كلها والسكاشن، وممكن يحضر محاضرة مرتين بس عشان يفهم، كمان بيرجع آخر اليوم عارف هيلعب امتي وهيذاكر امتي. 

منهجية الطالب دا ازاي اوصل لأعلي تقدير بفهم ومجهود مش كبير.

خطته كلاتي__

التزام بالمحاضرات بس الاهم هو فهم المحاضرة. 
مذاكرة باقي اليوم بس من مصادر خارجية. 
اجتماعي جدا يعرفه عدد كبير من الطلبة والدكاترة. 
بيخطط للوقت الفاضي في الراحة واللعب والخروجات
طبعا دا بيساعد نفسيته جدا ع المذاكرة والفهم. 

ودا اخر السنة بيوصل لتقدير كويس جدا، غالبا امتياز وممكن جيدا جدا، بس في الاخير بيكون راضي عنه تماما، وبيسعي لتحسينه.

افضل طريقة توصل بيها لأعلي تقدير

فهم المعلومة

ودي حاجه لازم تقويها في نفسك لانها هتقابلك كتير في الكلية، لازم توصل بنفسك انك تقدر تلعب بالمعلومة ومتكنش صعبة عليك، تقدر توصل لكدا بحاجتين.. 

1- سؤالك للدكاترة، المعيدين، اوائل الدفعة في اي معلومة تقف معاك (ممكن حد يخذلك). 

2- الانترنت ودا افضل صديق واسهلهم. 

المذاكرة

حضورك هو رقم واحد في الموضوع، تلخيص المحاضرات هيساعدك جدا، المصادر الخارجية هتقويك وتقوي عامل الفهم زي ما قلنا. 

الدرجات

لازم تدرس دماغك الدكتور من الامتحانات السابقة، تدي الاسئلة ذات الدرجات الاعلي اهتمام اكبر، ولازم من جواك تكون شايف ان الدرجات مش هي اللي هتقيمك، لأن دا بينعكس ع نفسيتك طول السنة.

اقرأ ايضا______ازاي اختار التخصص المناسب ليا في هندسة

انتظرونا في مقال جديد....