مهندس الواقع مهندس الواقع
recent

آخر الأخبار

recent
جاري التحميل ...

من دروس الحياة القاسية

 



من دروس الحياة القاسية 



عارفين المثل القائل


تعرف فلان ؟ آه أعرفه

طب عاشرته ؟ لأ ما عاشرتوش


يبقى ماتعرفوش


المثل ده رغم إنه صح إنك لازم تعاشر حد عشان تعرفه وتقدر تحكم عليه


لكن للأسف مش هايفيدك لو إنت معندكش الحكمة والخبرة الكافية لإنك ممكن تعاشر إنسان نص عمرك وفجأة تلاقيه إتغير وبقى واحد تاني خالص ولا أكنك تعرفه أو عاشرته قبل كده والسبب إنك مكنتش شايف صح .


الحقيقة إن الناس ما بتتغيريش لكن بيحصل موقف أو حدث معين بيكون السبب إن الوش التاني اللي مكنتش شايفه أو تعرف عنه حاجة أو مش منتبه إنه موجوده أصلا يظهر


وده لأن كتير من الناس بتظهر شخصية غير شخصيتها الحقيقية عشان يغطوا على عيوب فيهم أو لإن الشخصية المزيفة بتساعدهم يحققوا غرض صعب يتحقق لو بيتعاملوا بطبيعتهم.


يعني مثلا الشخص المستبد المسيطر أبو صوت عالي هاتلاقيه أصلا عنده إحساس بعدم الثقة في نفسه والضعف وإنه أقل من غيره عشان كده بيخلق شخصية مختلفة بيحاول يقنع الناس بيها إنه واثق جدا من نفسه وتلاقي ده بيظهر في صوته العالي ومحاولته دايما للسيطرة على غيره وكتير مننا بينخدع وبيصدق

 إقرأ أيضا سبب الغيرة على الأشخاص 

لكن في لحظة ممكن كل ده ينهار لو الشخص ده واجه خطر حقيقي أو موقف صعب وتلاقيه بقى جبان ومهزوز وخايف لإنه طول عمره شخصيته ضعيفه بس كان مخبي حقيقته ورا شخصية مزيفه اخترعها وصدقها لما الناس صدقتها.


يا فرعون ايه فرعنك؟ قال ملقتش حد يلمني

والأمثله كتير


يعني مثلا الإنسان إللي طول عمره بيعامل الناس ب احترام وطيبة واحيانا خنوع وتحسه تابع وسهل ترويضه فجأة تلاقيه بقى في منتهى القسوة والقوة والعند والغرور والتكبر


هو كمان متغيرش وكل ده كان موجود جواه ومستخبي لإنه كان بيحقق بالشخصية الضعيفة المترددة كل إللي هو محتاجة لكن أول ما قابل موقف أو خطر حقيقي يهدده أو وصل لغرضه أو مصلحته معاك إنتهت ظهر على حقيقته


اتمسكن لحد ما اتمكن

عشان كده ما تتخضوش أو تتفاجئوا لو حصل معاكم كده لإن هي دي الحقيقة.


ونصيحتي إنكم لازم تتعلموا إزاي تحموا نفسكم وتكتشفوا حقيقة الشخص اللي بتتعاملوا معاه قبل ما تثقوا فيه أو تقربوه منكم


اقروا عن مصاصي الطاقة وعن الاضطرابات النفسية والشخصية وعلاماتها وإزاي تقدروا تقروها وتكتشفوا إن الشخص اللي بتتعاملو معاه منهم أو لأ


المعرفة سلاح عظيم هايوفر عليكم جروح كتير وتجارب قاسية انتم في غنى عنها .


—-


العم حامد 

عن الكاتب

علاء الدين محمود

التعليقات


اتصل بنا

إذا أعجبك محتوى مدونتنا نتمنى البقاء على تواصل دائم ، فقط قم بإدخال بريدك الإلكتروني للإشتراك في بريد المدونة السريع ليصلك جديد المدونة أولاً بأول ، كما يمكنك إرسال رساله بالضغط على الزر المجاور ...

جميع الحقوق محفوظة

مهندس الواقع